“Apple” işə qəbul zamanı namizədlərdə bu 4 bacarığa fikir verir
Tim Kuk günlərlə CV-ləri nəzərdən keçirmir. Ancaq vəzifədə olduğu təxminən 11 il ərzində məşhur CEO, görünür, şirkətdə inkişaf etmək üçün nə etmək lazım olduğunu müəyyən edib.
Banker.az CNBC-yə istinadən xəbər verir ki, Kuk İtaliyanın Neapol şəhərində bir universitetin məzunlarına deyib ki, “Apple”ın uğuru şirkətin biznes mədəniyyətindən və kimin işə götürülməsindən asılıdır. Kuk qeyd edib ki, şirkət dörd bacarığa malik işçilər axtarır: komandada işləmək bacarığı, yaradıcılıq, maraq və işinin mütəxəssisi olmaq. CEO bacarıqları məhz bu ardıcıllıqla ifadə edir. Onun sözlərinə görə, komandada işləmək bacarığının bu qədər vacib olmasının səbəbi onun digər üç bacarığı özündə birləşdirməsidir: “Əməkdaşlıq prosesi “Apple” məhsullarının necə yaradıldığını nümayiş etdirir”.
Məşhur CEO bildirib ki, komanda ruhu yaradıcılıq və maraq hissinə töhfə verir, çünki hər üçü yeni ideyaları başlatmaq və ya inkişaf etdirmək üçün lazımdır.
Kuk deyib ki, “Apple” fərqli düşünən insanları axtarır. “Bu, şablondur”, “axmaq sualdır” deyilən bir şey yoxdur: “Bir uşağın verəcəyi kimi suallar vermək möhtəşəmdir”.
Lakin “Apple”ın işə götürmə taktikasının davamlı olaraq müsbət iş mühiti yaradıb-yaratmaması müzakirə mövzusudur. Şirkət bu il “Comparably”nin ən yaxşı biznes mədəniyyətinə malik qlobal şirkətlərin illik siyahısında özünə yer tapa bilmədi. Keçən il 14-cü yerdə olmasına baxmayaraq, ofis mədəniyyətinə görə “C” reytinqi almışdı.
“Apple” həmçinin “Glassdoor”un ABŞ-da işləmək üçün ən yaxşı yerlər üzrə illik reytinqində 20 pillədən çox geriləyərək 31-ci yerdən 56-cı yerə enib. Hər iki saytın araşdırmasında iş-həyat balansının pis olması, qeyri-müntəzəm iş qrafiki və rəqabətli iş mühitindən yaranan yüksək stress qeyd edilib.
“Apple” New York Times-a verdiyi açıqlamada, sentyabr ayında ortaya çıxan “zəhərli” iş mühiti ilə bağlı işçilərin şikayətlərinə cavab verib: “Biz hər zaman müsbət və inklüziv iş mühiti yaratmağa və bunu saxlamağa sadiqik. Biz bütün narahatlıqları ciddiyə alırıq və narahatlıq yarandıqda hərtərəfli araşdırırıq. Bununla belə, hər hansı aidiyyəti şəxsin məxfiliyinə hörmət etmək üçün biz işçilərlə bağlı konkret məsələləri müzakirə etmirik”.
Kukun sözlərinə görə, “Apple”ın işə götürmə taktikası ən azı altı ildir ki, mövcuddur. 2016-cı ilin oktyabrında Utah Texniki Turu zamanı Kuk demişdi ki, “Apple” öz işçilərində dahilik, qətiyyət, obsessiv maraq, komanda yönümlülük və həddindən artıq idealizm axtarır: “Biz həddən artıq ağıllı insanları axtarırıq, lakin ortada çoxlu ağıllı insanlar var. Bizə komanda ilə işləməyi bacaran insanlar lazımdır. Çünki heç kim, hətta kürəyində qanadları olan biri də təkbaşına hər şeyi edə bilməz”.
